des derf mer doch net

des derf mer doch net
des derf mer doch noch net emol denke
un als dochder derf mer des doch schunn gar net denke

awwer s denkt sich ääfach doch
awwer s denkt sich ääfach doch hoch
awwer s denkt sich ääfach doch ach bei re dochder hoch

wann d doch endlich mol
wann d doch endlich mol gehe detscht
wann d doch endlich mol fer immer gehe detscht
wann d doch endlich mol fer immer un ewig gehe kenne detscht mudder

jetzert mit deine 89 mudder

ich soll fer dich koche
ich soll mer daach fer daach dei iwwerzwerches gegiftel aaheere
ich soll dich verbinne un sauwermache
ich soll der noch dabber dei briefe schreiwe
un ich soll mich doch net so dabbich draastelle

du detscht doch noch alles heere
du detscht der doch ach jetzert noch dei spritze selwer gewwe
du detscht dich doch noch alle daach allää dusche

du hetscht dich doch frieher ach um mich gekimmert
du hetscht s doch immer gut gemäänt mit mir
du hetscht dich doch ach immer fer mich uffgeopfert

des is doch alles iwwerhaupt net wohr mudder awwer
du hoscht jo doch widder recht wie immer mudder
du hoscht recht wie all mei 61 lange johr lang mudder

un noch dezu vergesse soll ich alles annere mudder
des is doch de falsche mann
fer was gehscht n du mit zwää kinner noch schaffe
brave kinner kricht mer doch net vum gut zuredde
ennere mudder gebt mer doch net so beese widderworte
do ghert ach mol widder gebutzt

un jedesmol wann ich mich iwwer was gfräät hab mudder
hoscht du doch widder druff rumgetrambelt
un hoscht mer s kabutt gemacht

awwer gell mudder

des derf mer doch net
des derf mer doch noch net emol denke
un als dochder derf mer des doch schunn gar net denke

awwer doch doch
s denkt sich doch ääfach so
bei deinere liewe dochder hoch

wann d doch endlich mol fer ewig gehe detscht mudder
fer immer un ewig
dochdochdoch

Matthias Zech, 2024