Klää Jakob guckd beim Metzle zu,
die Sau is gschlacht, er gebt kä Ruh,
will alles wisse, steckt sei Nas
in jeden Zuwwer, jedes Glas.
Saacht zu ‚m de Unkel Schorschel: Wu,
wu is die Bodworschdgordel, Bu?
Oje, die fehlt. Kumm Jakob, schnell,
do hoschd e Mark, hol Kordel, gell!
De Jakob rennt, die Mark in d‘ Händ,
zu de Baas Ellis, wu er kennt:
E Brodworschdgordel, bitte schää!
– Oh, Liewer, do is kännie määh.
Er nemmt sei Mark und saust zum Sepp,
en Laade wu’s gebt Netzel, Knepp:
E Brotworschdgordel, liewer Mann,
wu mer die Brodwerschd binne kann.
De Sepp bedauert: Hemmer net,
do geh zum Willy, is sei Red.
De Jakob flitzt zum ledschde Gschäft
hot Angschd, en beeser Spitz dort kläfft.
Doch ach de Willy hot kän Strick
fer Brodwerschd, Jakob hetzt zurick:
Ojeoje, hab kännie kricht,
kä Brotworschdgordel, so en Mischd!
Was, Biewel, du hoschd kännie kricht?
Du Labbeduddel, ja, des bischd!
Jetz gäbt’s kä Worschd, Knecht, streng dich aa,
beeil dich, stell dich net so draa!
Klää Jakob is de Trääne noh,
ach, Brotworschdgordel, wo norr wo?
Er laaft halt nochmol zu de Baas
Ellis, wu grad senst ehr Gras.
Baas Ellis, s’is ganz ferchderlich
die Brodworschdgordel – nerchends krich
ich die im Dorf, ach, helf mer doch,
sunnschd schlacht mich noch de Brotworschdkoch.
Die Ellis schdellt die Sens in d’Eck:
Du, Jakob, des hot gar ken Zweck,
dass d‘ Brodworschdgordel kaafe duschd,
die Metzger, die hän dich veruutzt.
Sie nemmt den Jakob in de Arm
un drickdn, s’werd em bissel warm:
Wääschd, Brodwerschd, die wern abgedreht
ganz uhne was, geh, guck, wie’s geht.
De Jakob mit de roode Hoor,
der rennt zurick dorchs Scheierdoor.
Un mimme zornichgrelle Blick
plärrd er: Do hoschd dei Mark zurick!
Schmeißt se dem Metzger an de Kopp,
do dobbst se in de Broodworschdtopp,
un alles kreischd und johlt un lachd,
dass se sich so en Feetz gemacht.
Mit Aachewasser rennt de Bu
fort: Lossen mich in Ruh!
Rennt zu de Mudder, rot vor Wut,
– wu grad ihr Saile fittre duud.
Verzehlt re, was em is bassiert,
un wie sen an de Naas rumgfiehrt,
un greint, wie sich de Schorsch so bleed,
so wieschd, so bees verhalde deed.
Die Mudder nemmd’n in de Arm,
und dreeschdn, s’is zum Gotterbarm:
Idiote sin des, so strunzdumm
wie Affeärsch, ich saach der’s, kumm!
Do werd’s dem Jakob besser glei.
– Un korz druff bringt zu d‘ Hausdier nei
de Unkel Schorsch, dass Friede herrschd,
zwää Lewwer- un 10 Uutzbroodwerschd.
Matthias Zech, 2011