des derf mer doch net
des derf mer doch noch net emol denke
un als dochder derf mer des doch schunn gar net denke
awwer s denkt sich ääfach doch
awwer s denkt sich ääfach doch hoch
awwer s denkt sich ääfach doch ach bei re dochder hoch
wann d doch endlich mol
wann d doch endlich mol gehe detscht
wann d doch endlich mol fer immer gehe detscht
wann d doch endlich mol fer immer un ewig gehe kenne detscht mudder
blooer als wie bloo
de himmel
wann d dich bei mer eihenke duscht
roter wie rot
dein mund
in meim verkrumbelte kobb
voller wie voll
mei bruschtbumbere
vun deim herziwwerlaafiche lache
un mähner un weiterer als wie d weitscht welt
dut sich spichle
iwwerbunter wie bunt
in deine recheglänzische aache
un ich dodebei
blinner wie blind un daawer als wie daab
fer alles annere drumerumm
un schwärzer wie schwarz
die nächt
uhne dei schnurrisches schnaufe newedraa
alles dummzeich
falscher als wie falsch
so kammer des iwwerhaupt net saache
ää uumeglichie iwwertreiwung nooch de anner
des wer jo noch schänner
so dun ihr plärre
doch doch du
du wääscht was ich mään
lewwendicher feschderer mehrer
als wie die allminnanner zamme
gell gell
des do is werkligscht ganzigscht
uuiwwertriwwe
Matthias Zech, 2023
4. August 2022, Bretagne bei Erquy
so stolz gewest
in dem große Hof vun dem schääne alte Schloss
schiergar jedes Wort verstanne
vun dere junge Fremdefiehrerin
ihrm gschliffene Franzesisch
klänne Gschichdelscher vun frieher
so mutig gfiehlt
in dem große Hof vun dem schääne alte Schloss
als Deitscher unner denne ganze Franzose
des schlaue Mädel was frooche gewollt
iwwer die Leit do un dief Luft gholt
mei Franzesisch schunn schiergar uff de Zung
War nie im Krieg! War selwer nie im Krieg!
Hab selwer niemols gschosse, nie gebombt,
känn annre Mensch erschlache, massakriert,
kä Fraue gschännt, kä Kinner imme Keller
verschticke losse, Alte iwwerrollt
brutal un uhne Herz mit Panzerwache.
War nie im Krieg! Bin selwer nie gekrawwelt
wie Käwwer iwwer Felder, Grääwe, Grääwer,
fer eisenemme zwische doode Kamerade
en Berg, en Bunker, schwarze Barrikade.
wann d niwwermachscht
un riwwerguggscht
widder riwwermachscht
un niwwerguggscht
dann siescht s bschimmt ach
fer die hiwwe is hiwwe hiwwe
fer die driwwe is hiwwe driwwe
fer die hiwwe is driwwe driwwe
fer die driwwe is driwwe hiwwe
s is also hiwwe wie driwwe
norre grad
letzrum
Matthias Zech, 2022
Du mer mol mei Haut aagucke,
guck genau hie, loss mer Zeit,
guck ganz owwe, du mich ducke,
guck: Do isse rot, do trucke,
do vernarbt fer d Ewigkeit.
Jedie Narb dut mer verzehle
große, klänne Leidensgschicht:
Die do kummt vum Ebbelscheele,
die do is noch am Verhääle,
hab se vorschie Woch erscht kricht.
Spruch uffm Kriegerdenkmol in Bockrem
„Die Treue ist das Mark der Ehre“
Dorch Mark un Bää is mir der Spruch
vum Kriegerdenkmol gange.
Druff stahlhart en Soldat: Zeigt nix
vun Zittre, Angscht un Bange,
vun Kobbschiss, Menschefetze, vum
Versticke un Verrecke,
ach nix vun Panzerkette, vum
Verfriere un Verdrecke,
vun Kinnerträne, Mutterhoffe, lang
vermisste Vädder,
vum ausgebombte Hause in
paar zugig dinne Bretter.
jetz halt doch emool de gaul aa
du hettscht am aafang net gedenkt
dass des so lang halte deet
ich hett am aafang ach net gedenkt
dass des so lang halte deet
s erscht hoscht du mich in de lehr ausghalte
dodruff hab ich dich in de määschderschul ausghalte
do hämmer unsern zaschder zammegelecht
do simmer quitt
mir hänn dei schräächie schwichermudder ausghalte
mir hänn mein iwwerzwerche schwichervadder iwwerlebt
do hämmer alle beed zammeghalte
do simmer ach quitt
Norre weil du domols
dei schääne griene Aache so wiescht gerollt hoscht,
wie ich die bleede Witz gerobbt hab,
do is mer, norre weche dir,
ganz dormlich worre im Hern:
Un mein Kobb, den hab ich vellich verlore! Vellich!
Norre weil du dich domols
ääfach bei mer eighenkt hoscht,
wie mer hääm sin,
do bin ich, norre weche dir,
gschdolwert iwwer mei äächene Fieß:
Un mein Knechel umgeknixt, un wie! Ganz grie-gääl-bloo!
Weiterlesen
e feschtes nescht gebaut
hinner dere hoche mauer
aus grandiche grenzstää
verrammelt mit eisedoore
nix mäh neigelosst nix mäh
draagelosst ans eigemachte
die trääne verbrennt
s mitgfiehl vertrickelt
Weiterlesen